Биринчи Май райондук сотунун өкүлү: "Судья эртеңки күнгө белгиленген соттук отурумга Атамбаевдин келүүсүнө Жазаларды аткаруу кызматына милдеттендирди"

Бүгүн, 14-октябрда Биринчи Май райондук сотунда кримтөбөл Азиз Батукаевдин мыйзамсыз бошотулушу боюнча соттук алдын ала уктуруу өтмөк. Бирок бул жолу да мурдагы президент Алмазбек Атамбаев соттук отурумга келүүдөн баш тарткандыктан, алдын ала уктуруу дагы жылдырылды.

"3-октябрда Алмазбек Атамбаев, Индира Жолдубаева, Абдухалим Раимжанов, Калыбек Качкыналиев "коррупция" беренесине айыпталуусу боюнча кылмыш иши Биринчи Май райондук сотуна соттук өндүрүшкө келип түшкөн. Соттун токтому менен 7-октябрда соттук уктуруулар 11-октябрда өтөрү чечилген. Ал күнү Атамбаев соттук отурумга келүүдөн баш тарткан. Бүгүнкү күнгө жылдырылган соттук отурумга да келүүдөн баш тартты. Сот Жазаларды аткаруу кызматына эртеңки күнгө белгиленген соттук отурумга Атамбаевдин келишин камсыздап берүүсүнө милдеттендирди. Айыпталуучуну күчтөп алып келүү тууралуу сөз жок, анын келүүсүн камсыздоо тууралуу сөз болуп жатат", - деди Биринчи Май райондук сотунун басма сөз кызматынын өкүлү Асел Равшанбекова.

Мындан 6 жыл мурун Нарын шаардык соту кримтөбөл Азиз Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен. Ошол учурда Алмазбек Атамбаев президент, Индира Жолдубаева президенттик аппаратта соттук реформа жана мыйзамдуулук боюнча бөлүмдүн башчысы, Абдухалим Раимжанов гемотология борборунун башчысы, Калыбек Качкыналиев ЖАМКнын төрагасынын кеңешчиси болуп турган. Аталган 4 киши тең тергөө менен кызматташуудан баш тарткан.

Баары биригип кримтөбөл Азиз Батукаевдин абактан бошотулушун кайра кароо иши боюнча 19 адамга айып тагылган.