Прокурор: "Алмазбек Атамбаев соттук отурумду менсиз өткөргүлө деп өтүнүч катын жазса, ал каралмак, анын "мен катышпайм" дегени өтүнүчкө жатпайт"

Бүгүн, 14-октябрда Бишкектин Биринчи Май райондук сотунда кримтөбөл Азиз Батукаевдин өлкөдөн мыйзамсыз чыгып кетиши боюнча соттук алдын ала уктуруу өтмөк. Бирок бул иште айыпталуучу катары өтүп жаткан Алмазбек Атамбаев келбегендигине байланыштуу эртеңкиге жылдырылды.

"Өзүңөр көргөндөй, Алмазбек Атамбаев бүгүн да камерадан чыкпай коюп, соттук алдын ала уктурууга келген жок. Буга байланыштуу ага карата акт түзүлдү. Сот Атамбаевди алып келүү боюнча СИЗОнун башчысын жана конвойду милдеттендирди. Конвойдун милдети - соттун токтомун аткаруу", - деди Башкы прокуратуранын Жазык жана жарандык иштер боюнча улук прокурору Медербек Абдышев.

Журналисттердин "Атамбаевдин жактоочусу соттук отурумдарга катыша албайм деген арызын жазып бергенин айтып жатышат. Сиздер ал арыз менен тааныштыңыздарбы?" деген суроосуна төмөндөгүдөй жооп берди.

"Мыйзамда көрсөтүлгөн, эгер ал өтүнүч менен менин катышуумсуз карагыла деп жазса, биз карайбыз. Ал эми анын "мен катышпайм" дегени "менсиз карагыла" дегенге жатпайт.

Жазык-процессуалдык кодекстин 286-беренесинин талаптарына ылайык, соттук отурум айыпталуучунун катышуусунда өтүшү керек", - деди Абдышев.