Жогорку Кеңештин комитетинде сот системин өнүктүрүү боюнча долбоор кийинки жыйында каралмай болду

Бүгүн, 15-октябрда Жогорку Кеңештин комитетинде сот системин өнүктүрүү боюнча долбоору каралмак.

Депутат Курманкул Зулушев сот системин өнүктүрүү тууралуу долбоор боюнча баяндама жасаганга кимдер келгенин сурады.

Комитет төрагасы Канат Керезбеков баяндамачылар күн тартибинде бекитилгенин айтты. "Баяндамачы катары Жогорку Соттун төрайымы Гүлнара Калиева, Судьялар кеңешинин төрагасы Нурланбек Атаназаров, финансы министри Бактыгүл Жеенбаева бекитилген. Жогорку Соттун төрайымы, финансы министри иш сапарда", - деди Керезбеков.

Зулушев вице-премьер-министр дагы жыйынга катышуусу керектигин айтты. Ал бул маселени кийинкиде кароону сунуштады. Депутаттар бул сунушту колдоп, маселе кийинки жыйында каралмай болду.