"Биринчи жолу жубайым менен вальска түштүм". Комузчу, ырчы Азиз Батыров үйлөндү

Дастанчы, комузчу, ырчы Азиз Батыров 7-октябрь күнү 7 жылдан бери сүйлөшүп жүргөн кызына үйлөндү. "Жубайым Максатай, Баткендин кызы, өзү дагы комузчу", - деген Азиз Батыров жакшы кабары менен төмөнкүчө бөлүштү.

"Заманбап тоюбуз борбор калаадагы ресторандардын биринде өттү. Тойго биздин аттуу-баштуу ырчылар, ошондой эле өзүм чыгармачылыкта тапкан чет өлкөлүк досторум да конок болуп келишти. Өкүл ата, өкүл апа кылып Кыргыз Эл артисти Роза Аманованы жолдошу менен шайладык. Ал менин устатым болгондуктан аны тандадым. Үйлөнүү тоюбуз мен ойлогондой болду. Көпчүлүгү тойду кыргыз колоритинде болот деп ойлошуптур, бирок меники андай болгон жок. Жаштардын өзгөчө тою болду. Ошондой эле биринчи жолу жубайым менен вальска түштүм. Тойдо өзгөчө болсун деп жар-жарды "Маржан" тобунун 8 кызы ырдап, бизди киргизишти. Азыр Ош шаарындабыз. Жубайым өзүнүн келиндик милдетин аткарып жатат. Буюрса менин мектебимде эле комузчу болуп иштейт. Экөөлөп ал мектепти өнүктүрүп, өстүрөлү деген пландарды койдук", - дейт ырчы.