Кыргыз-Тажик чек арасындагы ок атышуудан жарадар болгондордун 12си ооруканадан чыгарылды

Кыргыз-Тажик чек арасындагы ок атышуудан жарадар болуп, Баткенден Бишкекке алынып келген 13 жарандын 12си ооруканадан чыгарылды. Бул тууралуу Саламаттыкты сактоо министрлигинин басма сөз кызматынан билдиришти.

"12 адам бир жума мурун ооруканадан чыгарылган. Алардын катарында 27 жаштагы ок атышуудан жарадар болуп комада жаткан жаран дагы бар. Ал эми бир жабырлануучу аял киши учурда Воронцовкадагы санаторийлердин биринде дарылануусун улантып жатат", - деди басма сөз кызматынан.

16-сентябрда Кыргыз-Тажик чек арасында ок атылып, 41 жаштагы чек арачы Равшан Муминов каза болгон. Мындан тышкары, дагы 13 жаран жаракат алган. Ал эми жаракат алгандардын баары тик учак менен Бишкек шаардык Травматология жана ортопедия илим изилдөө борборуна алып келинген. Башкы прокуратура каза болгон чек арачынын өлүмү боюнча кылмыш ишин козгогон.