Депутат Коомчулукту өнүктүрүү жана инвестициялоо агенттигинин башкаруу системин өзгөртүү керектигин айтты

Депутат Аалы Карашев Коомчулукту өнүктүрүү жана инвестициялоо агенттигинин башкаруу системин өзгөртүү керектигин айтты. Бул тууралуу ал бүгүн, 18-октябрда КСДП фракциясынын жыйынында билдирди.

Ал аталган агенттиктин директору Бекжан Супаналиев жыйынга даярдыгы жок келгенин белгиледи.

"Сиздин бул кызматка келгениңизге 11 ай болуптур. Мындай даярдык болбойт. Жыйынга 15 киши ээрчитип келиптирсиз, депутаттардын суроолоруна так жооп беришиңиз керек. Агенттиктин башкаруу системин жаңылоо керек. Байкоочу кеңешке отчёт берип коёсуңар болду. 2003-жылдан бери 17 жыл өттү. Жаңы системдерди киргизиш керек", - деди Карашев.

Учурда фракция жыйынында Коомчулукту өнүктүрүү жана инвестициялоо агенттигинин ишмердүүлүгү жөнүндө маселе каралып жатат.