Орусиянын "Удивительные люди" телеберүүсүнө Кыргыз өлкөсүнөн барган 12 жаштагы "калькулятор бала" катышты

Кечээ, 20-октябрда Орусиянын "Россия-1" телеканалында өткөн “Удивительные люди” ("Таң калычтуу адамдар") телеберүүсүндө Кыргыз өлкөсүнөн барган Арсен Рахымбеков он орундуу сандарды 18 секундда кошуп, көрүүчүлөрдү таң калтырды. Бул тууралуу аталган каналдын сайтына жарыяланды.

"12 жаштагы Бишкектен келген окуучу 3-курстун студенттери менен эсеп чыгарууда жарышып, аларды такыр эле караандатпай койду. Ал келечекте эсеп боюнча көрсөткүчүн дагы тездетип, "Гиннесстин рекорддор китебине" кирүү максаты бар", - деп айтылат маалыматта.

"Иним экөөбүз менталдык арифметиканы окуп баштаганбыз. Күн сайын жарышып, көрсөткүчтөрүбүздү жакшыртып турабыз. Эгер иним болбосо, мындай ийгиликке жетмек эмесмин", - деп айткан Рахымбеков.

Маалым болгондой, Арсен Рахымбеков буга чейин Германияда өткөн оозеки эсеп боюнча дүйнөлүк чемпиондукка катышкан. Учурда ал Бишкектеги эл аралык мектептердин биринде билим алат.