Өлкөдө гемодиализге муктаж болгон бейтаптар аны чектөөсүз жана кошумча каражат төлөбөстөн ала алышат

Октябрь айынан баштап гемодиализге муктаж болгон бейтаптар аны чектөөсүз жана кошумча каражат төлөбөстөн ала алышат. Бул тууралуу Саламаттыкты сактоо министрлигинин коомдук кеңешинин мүчөсү Венера Ташманбетова өзүнүн социалдык баракчасында билдирди.

"Бүгүн, 19-октябрда саламаттыкты сактоо министри Космосбек Чолпонбаев менен болгон жолугушууда гемодиализ маселеси тууралуу талкуу болду. Анда министр өкмөттүн 2019-жылдын 29-августундагы токтомуна өзгөртүүлөрдү киргизүү боюнча демилге киргизгенин айтты. Бул өзгөртүүлөр ушул жылдын 1-октябрынан баштап күчүнө кирген. Ага ылайык, жарандар гемодиализди 1 календардык айга мурункудай 12 сеанс эмес, 13-14 сеанс алуу мүмкүнчүлүгүнө ээ болот. Бейтаптар бүгүнкү күндөн тартып, керектүү процедураларды чектөөсүз жана кошумча каражатсыз ала берсе болот”, - деп айтылат маалыматта.

Маалыматты тактоо үчүн Саламаттыкты сактоо министрлигине байланышканыбызда, алар бул маалыматты тастыкташты.