Депутат өкмөттү энергетика тармагындагы инвестициялык долбоорлорду жүзөгө ашыруу үчүн жагымдуу шарттарды түзүүгө чакырды

Бүгүн, 22-октябрда Жогорку Кеңештин комитет жыйынында республикалык бюджет тууралуу мыйзам долбоору каралды.

Талкуу жүрүшүндө депутат Марат Аманкулов өкмөттү энергетика тармагындагы инвестициялык долбоорлорду жүзөгө ашыруу үчүн жагымдуу шарттарды түзүүгө чакырды. "Парламент энергиянын кайра жаралуу булактары жөнүндө мыйзам кабыл алды. Бирок өкмөт мыйзам алдындагы актыларды иштеп чыкмайынча аталган мыйзамдын аткарылышы мүмкүн эмес", - дейт Аманкулов.

Депутат мамлекеттик кызмат көрсөтүүдө төлөмдөрдү накталай жүргүзүү коррупциянын башкы элементи болуп каларын белгиледи. Андыктан төлөмдөрдү, эсеп-кысаптарды накталай эмес жүргүзүү зарылдыгын белгиледи.

"Маселен Транспорт жана жолдор министрлиги оор жүк ташуучу унааларды көзөмөлдөө пункттарына төлөм терминалдарын орнотуусу кажет. Бул чара төлөм төлөөдөгү ачык-айкындуулукту камсыздоого көмөкчү болот", - дейт ал.