Кыргыз курама командасынын Тажикстан жана Япония менен жакында Бишкекте өтчү оюндары күйөрмандарсыз өтүп калышы мүмкүн

Кыргыз курама командасынын Тажикстан жана Япония менен 14-ноябрда жана 19-ноябрда Бишкекте өтчү оюндары күйөрмандарсыз өтүп калышы мүмкүн. Бул тууралуу Кыргыз өлкөсүнүн Футбол федерациясынан билдиришти.

"Азырка мезгилде биз мурунку оюнда болуп өткөн тартип бузуу боюнча ФИФАнын тартип жана этика боюнча комитетинин чечимин күтүп жатабыз. Эске сала кетсек, Кыргыз-Мьянма беттеши орун алып жаткан учурда оюн талаасына бир күйөрман чуркап чыккан. Бул окуя үчүн Футбол федерациясын жаза күтүп турат, кийинки өтө турган оюндар күйөрмандарсыз да өтүп калуу коркунучу бар", - деп жазылат маалыматта.

Футбол федерациясы күйөрмандарына билеттер боюнча маалымат 4-ноябрда өтө турган ФИФАнын тартип жана этика комитетинин отурумунан кийин гана белгилүү болорун кулак кагыш кылат.

Кыргыз-Мьянма беттеши учурунда күйөрман футбол талаасына чуркап чыгып, Павел Матяш менен учурашканга жетишкен. Бул жорук кыргыз футболуна чоң көйгөй жаратарын улуттук курамдын башкы машыктыруучусу Александр Крестинин билдирген эле.

Буга чейин Австралия менен болгон оюнда да күйөрман талаага чуркап чыгып, анда Футбол федерациясына 28 миң доллар айып салынган.