Орусиядагы бала бакчада 4 жаштагы кичинекей кызды өзүнүн тайпалаштары тепкиге алды (видео)

Орусиянын Ярославль шаарында жайгашкан №236 бала бакчада 4 жаштагы кичинекей кызды, өзүнүн тайпалаштары тепкиге алган. Бул окуяны күбө видеого тартып алып интернетке таратып жиберген.

Күбөнүн айтымында, ал бул көрүнүштү көп кабаттуу үйдүн терезесинен тартып алган: "Окуя №236 бала бакчанын сейил аянтында орун алган. Орто топтун балдары эшикте ойноп жүрүп кичинекей кызды уруп, тепкилеп баштаган. Алгач балдар жөн гана ойноп жатат деп ойлогом. Бирок байкасам кадимкидей эле ортого алып тээп кетип жатышты. Мен тарбиячынын реакциясын күттүм. Бирок ал эч кандай кыймыл-аракет жасаган жок. Качан гана менин тартып жатканымды көргөндө, бөбөктүн жанына келди. Ошондо дагы анын жерде оонап жатканын айтып, урушуп алып кетти" , - деп жазган күбө.

Маалым болгондой, чуу жараткан окуя балдардын укугун коргоочу акыйкатчыны дагы четте калтырган эмес. Акыйкатчынын айтымында, "Эң негизгиси жабыркаган кыз менен ата-энесине психологиялык-моралдык жардам көрсөтүү керек. Ошол эле учурда бул окуяны тыкыр иликтеп, педагогдун ишине баа берип, мындай окуялар дагы кайталанбашы үчүн алдын алуу иштерин жасаш керек", - деп эскерткен.

Ал эми интернет колдонуучуларын кичинекей балдардын таш боордугу жана тарбиячынын кайдыгерлиги таң калтырган.

Учурда бул факты боюнча Ярославль прокуратурасы иликтөө жүргүзүп баштаган. Ал эми тарбиячы убактылуу жумуштан четтетилген.