Баткенде облустук оорукананын кызматкерлери иштен кетүүгө арыз жазышкан. Министрлик дарыгерлер штаттык режимде иштеп жатканын айтат

Баткен облустук ооруканасынын дарыгерлери айлыктын аздыгынан, иштөөгө шарттын жоктугунан улам иштен кетүү тууралуу арыз жазышканы айтылган. Саламаттыкты сактоо министрлиги учурда дарыгерлер жумуштан кетпегенин, алар штаттык режимде иштеп жатканын билдирди.

"Бүгүн, 30-октябрда министрликтин тапшырмасы менен Баткен облустук ооруканасынын дарыгерлерине түшүндүрүү иштери жүргүзүлдү. Мындан тышкары, өкмөттүн Баткен облусундагы ыйгарым укуктуу өкүлү, анын орун басары дарыгерлер менен жолугушту. Жолугушууда медицина кызматкерлери өздөрүнүн талаптарын айтышты. Учурда дарыгерлер көтөрүп чыккан маселени чечүү жолдору каралууда.

Облустук оорукананын кызматкерлери жолугушуунун жыйынтыгына канааттанышып, штаттык режимде иштеп, бейтаптарга медициналык жардам көрсөтүүнү улантышууда", - деди басма сөз кызматынан.