Мамлекеттик каттоо кызматынын мурдагы кызматкери Насирбек Алмаматовго издөө салынды

Транспортту каттоо жана айдоочулук күбөлүк берүү департаментинин Бишкек шаардык бөлүмүнүн мурдагы башчысы Насирбек Алмаматовго издөө салынды. Бул тууралуу Октябрь РИИБинин басма сөз кызматынан билдиришти.

Алмаматов Жогорку Соттун чыгарган чечимине ылайык, камакка алынышы керек болгон. Учурда ага издөө жарыяланып, анын жайгашкан жерин аныктоо жана кармоо боюнча издөө иш-чараларын Октябрь РИИБи жүргүзүүдө.

Насирбек Алмаматов 2018-жылдын 2-ноябрында УКМКнын кызматкерлери тарабынан унааларды каттоо, айдоочулук күбөлүк берүүдө коррупциялык иштерди түзгөн деп айыпталган.

Октябрь райондук соту Алмаматовду 12 жарым жылга эркинен ажыратып, андан кийин Бишкек шаардык соту ал өкүмдү жокко чыгарып, 3 миллион 300 миң сом айып салуу менен Алмаматовду бошоткон. Андан кийин Октябрь райондук соту Бишкек шаардык сотунун чыгарган чечиминин үстүнөн арыз жазган.

Жогорку сот 30-октябрда бул ишти карап, Бишкек шаардык сотунун чыгарган чечимин жокко чыгарып, Октябрь райондук сотунун өкүмүн күчүндө калтырган.