Америкалык жашоочу өлгөн курбусунан СМС билдирүү алды

7-ноябрдын таңында АКШнын жашоочуларынын телефонуна 14-февраль - Сүйүшкөндөр күнүндө жазылган куттуктоолор келген. Бул катачылыкты компьютердик техникалар боюнча иш жүргүзгөн "The Verge" америкалык сайты байкаган.

Маалыматка ылайык, СМС билдирүү жөнөткөндөрдүн көпчүлүгү алардын билдирүүсү убагында дарегине жетпей калганын билишкен эмес. Мындай маселе андроид, Apple колдонуучуларында жаралган. Америкалык уюлдук операторлору азыркыга чейин катачылыктын так себебин ачыкташкан эмес. Sprint (телекоммуникациялык байланыш) 7-ноябрга караган түнү оператор жаңыланганын маалымдады.

14-февралдагы билдирүүнү 9 айдан кийин алган америкалыктар жагымсыз жагдайга туш болгонун социалдык баракчаларына жазып чыгышкан. "Акыркы ай мен үчүн аябай оор болду. Жакын курбумдан айрылып, эми гана өзүмө келип баштаганда андан билдирүү келди. Алгач билдирүүнү окуганда баары түштөй, курбум тирүүдөй сезилип кетти. Курбумдун эски билдирүүсү экенин түшүнгөндө кайра жаратыма туз себилгендей кабыл алуу оор болду", - дейт интернет колдонуучу.

Ал эми jamie аттуу колдонуучу мурунку сүйлөшкөн жигитине каты эми жетип, кызыктай абалда калганын жазса, Барбара Колл июнь айында каза тапкан апасы тууралуу эжесинен "Апамдын абалы жакшы. Өзүн жакшы сезип калды", - деген кат келгенин айтат.