Бишкектеги эс алуучу жайдагы отургучтарды белгисиз жарандар талкалап кетишти

Бишкек шаарындагы Кыргыз мамлекеттик техникалык университетинин жанындагы эс алуучу жайына коюлган отургучтар белгисиз жарандар тарабынан талкаланып, сындырылган. Бул тууралуу Бишкек шаардык мэриясынан билдирет.

“Биз орноткон отургучтарды белгисиз адамдар сындырып, талкалоого аракет кылышкан. Отургучтарды орнотконубузга көп убакыт боло элек тагыраагы, ушул жылдын жаз мезгилинде орнотулган. Отургучтар абдан оор болгондуктан, аны көтөрүп талкалоого бир адамдын күчү аздык кылат. Себеби отургучтар абдан катуу буроолор менен бекитилгендиктен, аны ордунан жылдыруу мүмкүн эмес болчу. Отургучтарды атайын бир нече киши келип, буроолорун жулуп, талкалап кетишкен. Тилекке каршы, биз бир эле жыйынтыкка келе алабыз, отургучтарды атайын сындырышкан. Мындан улам биз эс алуу күнү экенине карабай отургучтарды оңдоп-түзөө үчүн алдырдык”, - деп маалымат тараткан мэриядан.

Мындан эки жыл мурун Бишкек шаарындагы “Бишкек мен сени сүйөм” деген жасалганы талкалап кеткен жигит кармалып, ал айып акча төлөгөнү белгилүү.

Ал эми ушул жылдын 30-августунда Кыргыз өлкөсүнүн Эгемендүүлүк күнүнө карата Чыңгыз Айтматов кең көчөсү менен Абсамат Масалиев көчөсүнүн кесилишинде жайгашкан сейил бактын ачылыш аземи өтүп, салтанаттуу аземге өлкө башчы Сооронбай Жээнбеков катышкан.

Сейил бак ачылганына көп өтпөй, ал жерде сүрөткө түшкөндөрдүн саны арбыган. Көп узабай социалдык тармактарга көпчүлүккө күтүүсүз болгон видео жарыяланып, талкууга түшкөнү белгилүү. Анда 2 кыз бири-бирин сүрөп "жашыл жаныбардын" үстүнө чыгып алып сүрөткө түшкөнү тартылган. Ага катар эле интернетке мындай жорук менен сүрөткө түшкөндөрдүн көп экенин көрсөткөн сүрөттөр тараган.