"Кыз-Бурак" тобунун 40 жылдык юбилейине 40 ырчы келди", - дейт Гүлшайыр Садыбакасова

Бүгүн, 10-ноябрь күнү Кыргыз Улуттук филармонияда "Кыз-Бурак" тобунун 40 жылдык юбилейлик концерти өттү. Концертке алып баруучулук милдетти Гүлшан Молдоева, Алмаз Касымалиев, Борончу Кудайбергенов, Айзада Жамгырчиева колго алышты. Алгач көрүүчүлөргө "Кыз-Бурак" тобунун тарыхын чагылдырган видео көрсөтүлдү. Андан соң топ түптөлгөндөн берки ырчылардан тартып, азыркы курамдагыларга чейин обон созушту. Кезинде "Кыз-Бурак" тобу музыкалык аспапта ойноп, жандуу ырдаган кыздары менен таанылып, өзгөчөлөнчү эмес беле. Топтун улуу муундагы ырчыларынын ырларды жандуу аткаруусу өткөн кезди эске салды. Ошондой эле топтон чыккан Гүлнара Калдарова, Айжамал Кабылова, Асел Касымова, Айпери Сыдыкова, Жумагүл Райымжан кызы жана башкалар юбилей концертти көрккө бөлөштү.

"Бүгүнкү күнгө чейин топтон 350 кызды тарбиялап чыгардым. Концертке "Кыз-Бурак" тобунун ар курамында ырдаган жылдыздары бир-экиден келишти. Жалпысынан 40 жылдык юбилейге 40 ырчы катышты. Юбилейлик-концертти өткөрүү үчүн 3 ай даярдандык.

Учурда мен Ошто, Сайкал Бишкекте жалпы 8 кызды тарбиялап жатабыз. Кыздардын жеген-ичкени, жашаган жери бекер. Мындай шартты бир гана биз түзүп беребиз", - дейт Гүлшайыр Садыбакасова.