Айэркен Саймаити Түркияда киши колдуу каза болду

"Азаттыктын" иликтөөсүндө аты аталган Айэркен Саймаити киши колдуу каза болду. Мындай маалыматты бир катар түрк басылмалары жазып чыгышты.

Маалыматка ылайык, Кытай жараны Айэркен Саймаитини Стамбул шаарындагы Фатих аймагында "Миллет-Стрит" мейманканасында белгисиз жарандар атып кетишкен. Окуя болгон жерге "Тез жардам" кызматы жана полиция кызматкерлери келишкен. Оор жаракат алган Айэркен Саймаити ооруканадан жан берген.

Учурда кылмышка шектүүлөрдүн аты-жөнү тактала элек. Тергөө иштери улантылып жаткандыгы жазылган.

Айэркен Саймаитинин ысымы "Азаттыктын" кабарчысы Али Токтакуновдун "Миллиондордун изи менен" деген иликтөөсүндө аталганы маалым. Иликтөөгө байланыштуу Жогорку Кеңештин депутаты Искендер Матраимов "Матраимовдордун Саймаити менен да, Бумаилиамуну менен да эч кандай байланыштары же алака-катнаштары жок" деп билдирген. Ушул жылдын июль айында Финпол "Азаттыктын" Матраимовдорго байланыштуу иликтөөсү боюнча Айэркен Саймаити тарабынан 2 миллион 300 миң доллар которулган акча өз далилин тапкан жок, бул суммага байланыштуу документтерди "Азаттык" көрсөтө элек" деген маалыматты тараткан. Ал эми "Азаттык" убада кылган иликтөөсүнүн уландысын азырынча жарыялай элек.