Рахманжан айылындагы көчөдөн Курманбек Бакиевдин ысымы алынды

Буга чейин Жалал-Абад облусуна караштуу Ноокен районунун Рахманжан айылындагы көчөлөрдүн бирине Курманбек Бакиевдин ысымы ыйгарылганы боюнча жазганбыз. Айыл өкмөтүнөн тургундар өз каалоолору менен көчөгө Бакиевдин ысымын ыйгарып алганын билдирген.
Көп өтпөй көчөгө ыйгарылган ысым алына турганын Кыргыз өлкөсүнүн Жалал-Абад облусундагы ыйгарым укуктуу өкүлүнүн маалымат катчысы тастыктаган.

Бүгүн, 11-ноябрда аталган көчөдөн Курманбек Бакиевдин ысымы алынганын Ноокен районунун айыл өкмөтүнүн башчысы Жакшылык Эгембердиев айтты.

Айтымында, учурда аталган көчөгө жаңы ысымдар сунушталып жатат.

"Рахманжан айылындагы аталган көчөгө ыйгарылган мурунку президент Курманбек Бакиевдин ысымы алынды. Көчөгө ыйгарылган ысым массалык маалымат каражаттарына маалымат таратылганда эле алынган. Учурда аталган окуя боюнча укук коргоо органдары териштирүү иштерин жүргүзүшүүдө. Буюрса, көчө башка атка өзгөртүлөт. Анткени көчөнүн пайдубалы жаңыдан курулуп жаткандыктан, мурун аты жок болчу. Азыр аталган көчөгө башка ысымдар сунушталууда", - деди Жакшылык Эгембердиев.