ЖЭБ соту: Кийинки соттук отурум 13-ноябрга белгиленди

Бишкектеги Свердлов райондук сотунда Бишкек ЖЭБди жаңылоодогу коррупция боюнча соттук отурум болуп өттү. Отурум мурдагы өкмөт башчы Жантөрө Сатыбалдиевдин сотко болгон өтүнмөсүнөн башталган. Анда ал суракка мурдагы өлкө башчы Алмазбек Атамбаев менен депутат Өмүрбек Текебаевдин чакыртылышын өтүндү. Бирок судья алардын көрсөтмөлөрү иш үчүн маанилүү эмес экендигин белгилеп, баш тартты.

"Электр станциялары" ишканасынын мурдагы директору Салайдин Авазов да сурак берди. Сурак учурунда ал: "TBEA" компаниясынын кызыкчылыгын көздөгөн эмеспиз. Бардык кабыл алынган документтер мыйзам чегинде жүргүзүлгөн. TBEAнын өкүлдөрү менен болгону 3 жолу жолуккам. Эгер ЖЭБди модернизациялоодогу кабыл алынган келишимдерге, токтомдорго, документтерге тиешеси бар адамдарды жоопко тартса, анда ЖЭБдин бардык кызматкерлерин камаш керек эле. Бул ири долбоор болгондуктан, ар бир этабында бир топ адамдар иштеген, салым кошкон", - деди Авазов.

Мындан тышкары, отурум учурунда айыпталуучулар жана жактоочулар Авазовго ар биринин бул ишке канчалык деңгээлде катыштыгы бар экенин тастыктаган суроолорду берди.

Соттук отурумда Сапар Исаковдун жактоочусу жеке менчик компаниянын чыгарып берген психологиялык-лингвистикалык экспертизанын жыйынтыгын тиркеп коюу үчүн судьяга өтүнүч келтирди. Буга Осмонбек Артыкбаевдин жактоочулары каршы чыгып, жактоочулар ортосунда келишпестик жаралды. Иштин материалдары жана жактоочулардын укуктары тууралуу кайым айтышуу жүрүп кеткендиктен, судья сотту жыйынтыктады. Кийинки соттум отурум 13-ноябрга белгиленди.

Маалым болгондой, сотто судья Инара Гилязетдинова төрагалык кылууда.