Москвада Кыргыз жаранына бычак сайып өлтүрүп кетишти

Кечээ, 11-ноябрда Москва шаарындагы поликлиниканын жанынан кебетеси азиялык болгон жарандын жансыз денеси табылган. Бул тууралуу орус басылмалары укук коргоо органдарындагы булактарга таянып жазышты. Анда бычак сайылып өлтүрүлгөн адам Кыргыз өлкөсүнүн жараны экени аныкталган.

“11-ноябрга караган түнү поликлиниканын алдында бычак сайылып, жаракат алган эркек киши тууралуу маалымат түшкөн. Ал жакка барган ыкчам топ болжол менен 24 жаштагы кишини табышкан. Анын денесине жана бутуна бычак сайылган экен. Жаран алган жаракаттарынан улам каза болуп калган. Кылмыштын куралы табылган эмес. Алдын ала маалыматтар боюнча маркумду кебетеси азиялык болгон эки киши өлтүргөн”, - деп айтылат маалыматта.

Бул факты боюнча тергөө жүрүүдө.

SUPER.KG порталы маалыматты тактоо үчүн Кыргыз өлкөсүнүн Орусиядагы элчилигине байланышканда, алар маалыматты тактап, төмөндөгүдөй маалымат беришти: "Киши колдуу болуп каза тапкан С.А. аттуу Кыргыз өлкөсүнүн жараны 1995-жылы туулган. Ал Лейлек районуна караштуу Исфана шаарынын тургуну болгон. Бул факты боюнча кылмыш-жаза иши ачылды. Учурда Элчилик жана маркумдун жакындары тарабынан "Жүк-200" боюнча сөөктү мекенине жөнөтүү аракеттери жүргүзүлүп жатат", - дешти элчиликтен.