ЖЭБ соту: "Бул отурум цирк болуп калды". Судья менен Сапар Исаковдун жактоочулары ортосунда келишпестик жаралып, Исаков судьяны бул иштен баш тартуусун талап кылды

Бүгүн, 13-ноябрда Бишкектеги Свердлов райондук сотунда Бишкек ЖЭБди жаңылоодогу коррупция боюнча соттук отурум уланууда. Анда отурум "Улуттук энергохолдингдин" мурдагы башчысы Айбек Калиевдин жактоочусунун судьяга болгон өтүнмөсүнөн башталган. Ал отурамга TBEAнын өкүлүн суракка алуу үчүн дистанциондук байланыш түзүп берүүсүн өтүнгөн. Буга судья TBEAнын өкүлү УКМКга сурак берип жаткандыктан, өтүнмөнү аткаруудан баш тарткан.

Мамлекеттик айыптоочулар өткөн отурумдагы Исаковдун жактоочусунун өтүнмөсү мыйзам чегинде аткарылышы мүмкүн эместигин билдирди.

Судья менен жактоочу Нурбек Токтакуновдун ортосунда келишпестик жаралды. Анда судья жактоочу этиканы сактабай жатканын эскертти. Буга жактоочулар судья отурумду теңчиликте жүргүзбөй жатканын айтып нааразы болушту. Ал эми жактоочу Замир Жоошев: "Бул отурум цирк болуп калды", - деп эмоционалдуу жооп берди. Нурбек Токтакуновдун айтуусунда мамлекеттик айыптоочулар кылмыш-жаза кодексинин беренелерин негизсиз колдонуп жатат.

Сапар Исаков судьяны бул иштен баш тартуусун талап кылды.

Судья кеңешүүдөн келгенден кийин Исаковдун өтүнмөсү негизсиз экенин айтып, отурум уланарын айтты.