2020-жылдан баштап Германиянын Кыргыз өлкөсүндөгү элчилиги 3 өлкөгө виза берүүнү токтотот

Германиянын Кыргыз өлкөсүндөгү элчилиги 2020-жылдын 1-январынан баштап Австрия, Испания жана Италия мамлекеттерине виза берүүнү токтотот. Бул тууралуу элчиликтин маалымат кызматынан билдиришти.

"Бул жобо дипломатиялык, кызматтык паспорту барларга дагы тиешелүү. Ушул жылдын 31-декабрына чейин Испанияга, Италияга жана Австрияга баруу үчүн виза алабыз деп кайрылгандардын арыздары элчилик тарабынан каралып чыгат", - деп жазылат маалыматта.

2020-жылдын 1-январынан баштап жогорудагы өлкөлөргө виза алуу боюнча төмөнкү дарекке кайрылуу керек болот.

Австрия: Австриянын Нур-Султан шаарындагы (Казакстан) элчилигине;

Испания: Германиянын Нур-Султан шаарындагы (Казакстан) элчилигине же Алматы шаарындагы "BLS" виза борборуна;

Италия: Италиянын Нур-Султан шаарындагы (Казакстан) элчилигине.

Ал эми Германиянын Кыргыз өлкөсүндөгү элчилиги Бельгия, Греция, Люксембург, Нидерланды, Норвегия, Португалия жана Швеция мамлекеттерине Шенген визасын берүүнү улантат.