Мамлекеттик ЖМКларды бир корпорацияга бириктирүү каралууда

Өкмөт бюджеттин чыгымдарын оптималдаштыруу максатында мамлекеттик жалпыга маалымдоо каражаттарын бир корпорацияга бириктирүү маселесин кароодо. Бул тууралуу кечээ, 14-ноябрда Жогорку Кеңештин жыйынында вице-премьер-министр Алтынай Өмүрбекова билдирди.

Мамлекеттик басылмалардын чыгымдарын азайтуу сунушун депутат Дастан Бекешев сунуштаган. Ал: "Мамлекеттик массалык маалымат каражаттарына жумшалчу чыгашаны кыскарталы десек, силер тескерисинче ушул жылда 40 миллионду «Пирамидага», «5-каналга» берип атасыңар. Кийинки жылда 10 миллион 500 миң доллар кетет экен. Ошонун ичинде «Кабар» агенттигине 22 миллион сом, «ЭлТР», «МИР» телеканалдарына 552 миллион сом, журнал-гезиттерге жана коомдук телеканалдарга 80 миллион сом жумшалат экен", - деди Бекешев.

Ал эми вице-премьер-министр бул кыскартылгандан кийинкиси экенин, облустагы гезит-телеканалдар бир медиа-борбор катары түзүлүп жатканын билдирди. "Эми "Кабар" , "5-канал" жана башка мамлекеттик ЖМКларды бир корпорация катары түзүү каралууда", - деди Өмүрбекова.

Маалым болгондой, Маданият, маалымат жана туризм министри Азамат Жаманкулов июль айында мамлекет республикадагы 34 райондук гезитти каржылоону токтотуу ниетинде экенин айткан.