Италияда ажырашкан эркектер үчүн баш калкалоочу жайлар ачылууда

Италияда аялы менен ажырашып, соттун чечими менен мүлксүз калган эркектер үчүн атайын баш калкалоочу жайлар ачылууда. Бул тууралуу чет элдик маалымат булактары жазууда.

Маалыматка ылайык, статистика Италияда сот эркектерге мүлктү калтырган чечимдерди дээрлик кабыл албагандыгын көрсөткөн. Мындан аталган өлкө улам үй-бүлөсүнөн эле эмес, бүтүндөй мүлкүнөн да ажырап калган эркектер үчүн убактылуу жашап туруучу жайларды ачууда. Маалыматта аларга "жаңы кедейлер" деген макам да берилери жазылган.

Түгөйлөр ажырашкан учурда алардан 60 пайыз эркектерге мүлк тийбей калат. Балдар апасында калгандыктан, мүлк аялдарга бөлүнөт. Ал эле эмес ажырашкан эркектердин 94 пайызы балдарына гана эмес, мурдагы жубайына кошуп алимент төлөөгө милдеттендирилген.

Мындай абалды байкаган диний, коомдук уюмдар жана ыктыярчылар бул абалга туш болгон эркектердин борборун ачууну демилгелешкен. Ага келген эркектер материалдык жана психологиялык жактан жардам ала алышат. Ошондой эле ал жерден балдары менен да жолугушууларды өткөрүүгө шарттар каралган. Борбор келгендерге бир жылга чейин жардам көрсөтөт. Бул убакыт ичинде мырза кайрадан калыбына келип, жумушун, жашоосун ирээттештирип алуусу керек.