Иранда митингге чыккандар борбордук банкты өрттөп салышты

Иранда кайрадан митинг жүрүүдө. Чет элдик маалымат булактары нааразычылык акциясы 15-ноябрда башталганын жазышууда. Бул жолу эл күйүүчү майдын кымбатташына каршы болуп жатышканы жазылат маалыматта.

Ага ылайык, Иран өкмөтү күйүүчү майдын баасын литрине 10 миң риалдан 15 миң реалга, тактап айтканда, 50 пайызга кымбаттаткан. Мындан тышкары, бир адамга сатылуучу бензинге көлөмдүк чек коюлган.

Полиция митингге чыккандарды таратуу аракетин көрүп, көздөн жаш чыгаруучу газ колдонгон. Айрым маалыматтар боюнча, нааразычылык акциясына чыккандар арасында каза болгондор да бар. Митингчилер күйүүчү майлар сакталган жайларга кирип барууну көздөп, аны өрттөө аракетин көрүшкөн. Андан кийин алар борбордук банкты өрттөп салышты.

Мамлекеттик маалымат булактары митингге чыккандар чет өлкөнүн каражатын алып ушундай аракетти жасап жатышат деген тейде маалымат таратууда. Ирандын башкы прокурору Мохаммад Жафар Монтазери да ушундай пикирде экендиги белгиленет маалыматта. Митингчилер болсо көчөлөргө коюлган көзөмөл камераларды да талкалашууда.

Мындай башаламандыктар АКШ Иранга карата санкция киргизгенден улам болууда деген божомолдор жазылып келет. АКШ Иран менен ядролук куралдардын келишиминен чыгып кеткен. Буга Иран өз амбициясынан кайтты деп, ишеним көрсөтпөө себеп болгон.