Үй-бүлөдө үч эм же андан ашык бала төрөлсө, ар бир балага 50 миң сомдон берилет

Үй-бүлөдө үч эм же андан ашык бала төрөлсө, ар бир балага 50 миң сомдон бир жолку "балага сүйүнчү" жөлөк пул берилет. Тиешелүү чечимге премьер-министр Мухаммедкалый Абылгазиев кол койду. Чечим 2019-жылдын 1-декабрында күчүнө кирерин өкмөттүн аппарат кызматынан билдирди.

"Үй-бүлөлөрдү социалдык-экономикалык колдоо, балдарды толук кандуу өнүктүрүү, алардын кызыкчылыктарын жана укуктарын коргоо, алардын саламаттыгы, билим берүү, тарбиялоо, коопсуздук маселелерин чечүү боюнча чаралар өкмөттүн социалдык саясатынын артыкчылыктуу багыттарынын бири болуп саналат. Өкмөт социалдык жана балдарды коргоонун институционалдык механизмдерин жакшыртуу иштерин жүргүзүп жатат.

Үй-бүлөнүн жашоо-шартына карабастан, бала төрөлгөндө бир жолку "балага сүйүнчү" жөлөк пулу берилет" деди маалымат кызматынан.

Ошондой эле ден соолугунан мүмкүнчүлүгү чектелген, дайыма кам көрүүгө муктаж болгон балдары бар ата-энелерди колдоо максатында "персоналдык ассистент" кызматы ишке киргизилди. Бул кызмат балага үй-бүлөсүнүн курчоосунда калууга шарт түзөрүн кошумчалады басма сөз кызматынан.