Мирбек Атабеков Нурак Абдрахмановдун "Аппак сүйүү" ырын кавер аткарды. "Ыр элге жагат деп күткөн эмесмин" дейт ал.

Кыргыз Республикасынын Эмгек сиңирген артисти Мирбек Атабеков күү атасы Нурак Абдрахмановдун "Аппак сүйүү" аттуу ырын кавер аткарды. Ырчы мырзанын аткаруусундагы вариант бат эле угуучуларын таап, алкоого алынды. Ырды кандайча аткарып калгандыгы тууралуу Мирбек SUPER.KG порталына айтып берди.

"Бул ырды мурун жаздырып, телефонума сактап койгон элем. Учурда АКШда жүрүп, ырды угуп отуруп iMovie программасына сүрөтүмдү коюп монтаж кылып жүктөгөм. Комуздун аткаруусунда ырым элге жагып калат деп күткөн эмесмин. Абдан көп жакшы пикирлерди уктум. Мындан ары да эски ыр болобу, жаңыбы, кавер аткарып чыгарып турайын деп ойлоп жатам. Себеби комуздун үнүн жактырып, комуздун коштоосунда ырларды уккусу келгендер көп экен.

Мен Нурак Абдрахмановдун күйөрманы болом. Агай каза болоруна жарым жыл калганда үйүнө комуз үйрөнгөнү барып жүргөм. Комуз менен ырдап берсем, "үнүң жакшы турбайбы. Сен комуз менен ырдашың керек экен. Каяктагы батыштын ууланган музыкаларын туурап ырдагандан көрө, өзүбүздүн ырларды аткарганың жакшы" деп жакшы комплименттерди айткан. Ал кезде Юля Руцкая "Аппак сүйүүнү" аткарып, катуу чыгып жаткан мезгили эле. Андан кийин агайдын көзү өтүп кетти. Ошону менен агайга бара албай калдым. Менин жашоомо таасир эткен 2-3 адам бар. Алардын бири - Нурак агай болчу", - деп эскерет Мирбек.