Англиялыктарга белгисиз бирөө 5 жылдан бери баштыкка салынган акча калтырып жатат

Англиялык Дарем графтыгынын полициясы 5 жылдан бери Блэкхолл-Кольери айылынын тургундары таап жаткан акча салынган баштыктын ээсин таба албай убара. Бул тууралуу чет элдик басылмалар жазышууда.

Алгачкы жолу мындай сырдуу окуя 2014-жылы катталган. Андан бери 12 ирет акча салынган баштык табылып, анын төртөө быйыл табылды. Баштыктарды атайын байкаш үчүн көрүнүктүү жерге калтырышары маалым. Баштыкта ар дайым 2000 фунт-стерлингдин тегерегинде (болжолдуу 180 000 миң сом) акча болот. Тургундар тапкан баштыкты полицияга алып барышат. Бирок аны издеген адам чыкпаган соң, полиция тапкандарга сыйлык катары кайтарып берет.

Полиция кызматкерлери жашоочуларды, мекемелерди, банктарды сураштырып, иликтешип да акчаны ким калтырып жатканын аныктай алышкан эмес. Алардын пикиринде, акча салынган баштыкты бирөө атайын жергиликтүү тургундарга жардам катары жөнөтүүдө.