Депутат Мирлан Жээнчороев: "Өлкөдө уюшкан кылмыштуу топ бар. Аны менен күрөшүү керек". КҮНСОБОЛ

Бүгүн, 21-ноябрда ички иштер министринин орун басары Мирлан Каниметов маалымат жыйында Кыргыз өлкөсүндө уюшкан кылмыштуу топ жок экенин айтты. Ал бүгүнкү күндө ИИМ уюшкан кылмыштуу топтун мүчөлөрүнүн эсебин жүргүзө турганын белгиледи. Бирок бул сандар ички иликтөө үчүн гана колдонула турганын кошумчалады. Министрдин бул сөзү коомчулукта талкууга түштү.

Мындан улам SUPER.KG порталы "ИИМ өлкөдө уюшкан кылмыштуу топ жок деди. Ишенесизби?" деген собол салды.

Жогорку Кеңештин депутаты Мирлан Жээнчороев уюшкан кылмыштуу топ мамлекеттин коопсуздугуна шек жаратат деген оюн билдирди.

"Кыргыз мамлекетинде уюшкан кылмыштуу топтор бар. ИИМде атайын каттоодо турган топтун мүчөлөрү бар. ИИМ бизге уюшкан кылмыштуу топтун мүчөлөрүнүн санын айтып турат. Балким, министрдин орун басары суроону түшүнбөй калса керек. ИИМдин Уюшкан кылмыштуулукка каршы күрөшүү башкы башкармалыгы дагы бар. Уюшкан кылмыштуулук топ мамлекеттин коопсуздугуна шек келтирет. Алар менен күрөшүү керек", - дейт Жээнчороев.