Өмүрбек Текебаев: "Баары коррупция 2017-жылга чейин болуп келген деп эле токтоп калышат. Мен коррупция азыр да уланууда деп айтам"

"Ата Мекен" партиясынын лидери Өмүрбек Текебаев өлкөдө Бажы кызматындагы коррупция дагы деле жоюла элек деген пикирин айтты. Бул тууралуу ал бүгүн, 26-ноябрда журналисттердин суроолоруна жооп берип жатып билдирди.

"Кыргыз өлкөсү коррупцияланышкан өлкө. Бардык тармактарда, анын ичинде укук коргоо органдарында, фискалдык органдарда дагы коррупция бар. Кыргыз өлкөсүнүн экономикасын 10-20 жылдан бери колдоп турган валюта булактары төмөндөгүлөр: биринчиден, баңги затын сатуудан түшкөн долларлар. Экинчиден, реэкспорт. Реэкспорттун жардамы менен Кыргыз өлкөсү бүткүл Борбор Азиянын базарына айланган. Мисалы: "Кара-Суу", "Дордой" базарлары. Акыркысы жана эң негизгиси бул - мигранттардан келген акча каражаттары. Кыргыз экономикасынын валютасынын өзгөчө бекем турушунун сыйкырын мына ушул нерселер менен түшүндүрсө болот.

Бизде реэкспорт коррупциялык жол менен болуп келген, жана болуп жатат. Баары коррупция 2017-жылга чейин болуп келген деп, андан кийинкисин айтпай токтоп калышты. А мен айтат элем, коррупция токтогон жок, азыр да уланып келе жатат. Ушунун баарын президент, өкмөт токтотушу керек. Күнөөлүүлөр жазаланышы керек. Бирок жаза тартчулар абдан көп. Бир гана Бажы кызматында эмес, УКМК, прокуратура баары аралашкан. Мындай айтканда, катардагы кызматкерден баштап генералдарына чейин аралашкан. Эгер текшерсе, мыйзамсыз баюу так ошол жерлерден чыгат. Бажыдагы коррупцияга байланышкан журналисттик иликтөөнү президент дагы, депутаттар дагы, коом дагы буйтап өтүп, көз жаздымда калтыра алышпайт, ага укугу дагы жок", - деди Текебаев.