ЖЭБ соту: Отурумда мамлекеттик айыптоочулар TBEA компаниясы жаңылаган Бишкек ЖЭБи менен Дүйшөмбү шаарындагы ЖЭБди салыштырышты

Бүгүн, 27-ноябрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Буга чейин иштин материалдарын иликтөө процесси жүргөн. Анын алкагында иштин бардык 55 тому иликтенип бүткөн. Отурумдун башында судья Инара Гилятзединова мурдагы энергетика министри, бул иште айыпталып жаткан Осмонбек Артыкбаев өз калоосу менен мамлекетке 100 миллион сом төлөгөнүн айткан.

Андан кийин тараптардын жарыш сөзү башталган. Алгачкы жарыш сөздү мамлекеттик айыптоочулар баштады. Алар тергөөдө жана ишти иликтөөдө айыпталуучуларга коюлган күнөөнү негиздеп жатат. Анда Исаков, Калиев, Назаров, Авазов "TBEA" компаниясынын электр энергия жана энергетика тармагында тажрыйбасы жок экенин билип туруп, бул фактыны эске алган эмес экендиги айтылды. Тергөөдө алардын бул ишке атайын барганы маалым болду.

Мамлекеттик айыптоочулар "TBEA" компаниясынын Тажикстан мамлекетинин Дүйшөнбү шаарында курган ЖЭБ менен Бишкек ЖЭБин салыштырышты. Ага ылайык, эки долбоорго кеткен чыгымдар, жасалган иштин сапаты жана көлөмү мисал катары келтирилди. Дүйшөнбү шаардык ЖЭБи жаңыдан баштап курулуп, толук кандуу жаңы ЖЭБ-2 тургузулганы айтылды. Ал эми Бишкек ЖЭБи курулган эмес, ал жөн гана модернизациядан өткөндүгү белгиленди.