ЖЭБ соту: Жантөрө Сатыбалдиев: "Камактагы бир күн - бир кылымга тете болуп жатат"

Бүгүн, 28-ноябрда Бишкектин Свердлов райондук сотунда ЖЭБди жаңылоодогу коррупция боюнча соттук отурум уланууда. Бүгүнкү отурумда айыпталуучу тарапка жарыш сөз берилди. Анда мурдагы өкмөт башчы Жантөрө Сатыбалдиев жарыш сөзүн айтып жатып, камактагы бир күнү Чыңгыз Айтматов чыгармасында жазгандай, бир кылымга тете болуп жатканын белгиледи.

"Тергөөнүн алкагында, күбөлөрдүн бирөө дагы менин бул ишке катыштыгым бар экендигин далилдеген кыйыр же түз көрсөтмө берген жок. Урматтуу судья, сизге өтө оор жоопкерчиликти илип коюшту деп ойлойм. Чынын айтканда, мен сизди аяп жатам. Анткени судьянын колу менен мыйзамсыз иштерди жүргүзүү максаты ишке ашып жатат. Мага коюлган күнөөнүн бирин дагы моюнума албайм. Айыптоочу тарап негиз кылып жаткан долбоордун сметасы мамлекеттик стандарттан өткөн эмес, анда ал мыйзамсыз деп саналыш керек эле да. Кылмыш иши иликтенип жатканда, жаш тергөөчүлөр ЖЭБке байланыштуу бардык документтерди топтошкон. Бирок ал иш-кагаздардын бир тобу жок кылынган", - деди Сатыбалдиев.