"Жылуу кийимчен аткаминерлерди окуучу кыздар жайкы кийим менен тосуп алышты". Тажикстанда талкууга түшкөн сүрөт

Тажикстанда окуучу кыздардын аткаминерлерди тосуп алган кезде тартылган сүрөтү дале талкууда. Жергиликтүү маалымат каражаттарында жазылгандай, аталган республиканын Темурмалик районунда ветеринардык аптеканын ачылыш аземи өткөн. Ага район башчысынын милдетин аткаруучу келген. Район администрациясынын башчысынын милдетин аткаруучу Фотех Аминзода жана аны коштоп келгендер жылуу кийим менен турушкан. Ал эми ачылыш аземде аларды тосуп алган окуучу кыздар жайкы кийим менен турушкан.

Бул сүрөт интернетке тарагандан кийин талкуу жаратып: "Бул кошоматчылык", "Окуучуларды аягыла" деген өңдүү пикирлер жазылган. Райондук администрация "окуучу кыздарды мажбурлаган эмеспиз, алар өздөрү тосуп алышкан" деп билдиришкен. Ал эми айыл өкмөтү ачылыш азем болгону 10-15 мүнөткө созулганын, кыздар дароо жылуу кийимдерин кийишкенин айткан. Кыздар окуган мектептин мугалими кыздар өздөрү да, ата-энелери да буга макул болушканын, мындан эч кимге эч кандай зыян келбегенин айткан.

Ал эми аткаминерлерди тосуп алган окуучунун биринин атасы бул абал бат-баттан кайталана турганын, аткаминерлерди тосуп алууда жосунсуз жоруктарды жоюу керектигин айткан. Ошондой эле бул күнү кызынын дене табы көтөрүлүп ооруп калганын билдирген.