Орусияда кафеге ак боз ат минип келген жигит тейлөөчү кызды көздөй ок атты

Орусиянын "Корреспондент" басылмасы кафедеги жаңжалдан кийин ачууланып кеткен кардар кайра кайтып келип, ал жактагы кызматкерлерге ок атканын жазууда. Маалыматка ылайык, Орусияда кафеде эс алып жаткан жигит ал жактагы тейлөөчү кызга тийише баштаган. Тейлөөчү кыздын күйөөсү да ошол эле кафеде иштегендиктен, муну байкап калып кардар экөөнүн ортосунда чыр чыккан.

"Ачууланган кардар кайра кайтып келерин айтып кафеден чыгып кеткен. Бир саат өтпөй кардар жасанып-түзөнүп, ак боз ат минип келген. Атын кафенин сыртына байлап коюп, өзү имараттын ичине кирип травматикалык тапанча менен кызматкерлерди, анын арасынан тейлөөчү кызды мээлеп аткан. Кызды ошол жердеги балдардын бири коргоп калган. Ошол учурда кафедеги дагы бир кызматкер тапанча менен кардарды көздөй атып, ал окуя болгон жерден качып кеткен", - деп жазылат маалыматта.