ЖЭБ соту: Сапар Исаков: "Депутат Кожобек Рыспаев СМЕС компаниясынын кызыкчылыгын коргогон"

Бүгүн, 3-декабрда Бишкектеги Свердлов райондук сотунда ЖЭБди жаңылоодогу коррупция боюнча ачык соттук отурум уланууда. Анда тараптардын жарыш сөзү жүрүүдө. Мурдагы өкмөт башчы Сапар Исаков өз сөзүндө айыптоочу тарап депутат Кожобек Рыспаевдин көрсөтмөсүнө шилтеме кылып, ага негизсиз айып коюп жатканын айтты.

"2017-жылдын 7-февралында депутат Кожобек Рыспаев ЖМК аркылуу ЖЭБ боюнча өз нааразычылыгын билдирген. Бул ЖЭБде авария болгондон кийин болгон. Анда депутат ЖЭБдин модернизациясы сапатсыз жасалганын айткан. Кайрылуудан көп өтпөй, Кытай тарап Элчилик аркылуу нааразычылыгын билдирген. Мен ээлеген кызматымдын милдеттеримдин алкагында, жана КСДП партиясынын мүчөсү катары партиялашымды бул маселе тууралуу сүйлөшүү үчүн чакыргам. Экөөбүздүн сүйлөшүүбүз 2017-жылы болгонун эске сала кетейин. Алгач анын эмнеге нааразы болуп жатканын сурадым. Ал ЖЭБ үчүн Кытайдан келген шаймандардын баасы кымбат болгонуна нааразы экенин айтты. Анда мен башка мамлекеттин бакчасына таш ыргытардан мурда маалыматты тактап, фактыларды көрсөтүш керектигин эскерттим. Рыспаев буга макул болуп, тиешелүү мекемеге суранма жөнөтүп, эсеп баракчасын алдырарын жана сметчиктерди жалдарын билдирген. Кийин суракта ал суранмага жооп келбегенин айтты. Иликтөөдө ал суранма жөнөтпөгөнү белгилүү болду. Кантип эл өкүлүнүн суранмасына "Электр станциялары" жооп бербесин? Депутаттын ар бир суранмасын мамлекеттик мекемелер аткарууга милдеттүү да. Демек, Рыспаев жалган көрсөтмө берген. Айыптоочу тарап ЖЭБ боюнча келишимге 2013-жылы кол коюлганына карабай, андан үч жарым жыл өткөн соң, авариядан кийин болгон сүйлөшүүнү айыптын негизине киргизип койгон. Бирок мен эч нерсеге таң калбай калдым", - деди Исаков.

Сапар Исаков кыңыр иш кырк жылда болсо да билинерин кошумчалады.