"NewTV" телеканалынын тартуучу тобуна мыйзамсыз күркө иштеткендер тарабынан кол салуу болду

“NewTV” телеканалынын тартуучу тобуна кол салуу болуп, камера жараксыз болуп калды. Аталган каналдын журналисти Дүйшөн Шаршенбеков окуя бүгүн, 3-декабрда саат 15:30 чамасында болгонун айтып буларга токтолду.

"Бишкектеги Ак-Ордо конушундагы Тагай бий жана Ак-Болтоң көчөлөрүнүн кесилишинде май алмаштыруучу жай бар экен. Ошол жердин кожоюну май куюучу жайдын алдына азык-түлүк сатуучу күркө коюу үчүн убактылуу уруксат алыптыр. Быйыл күркө иштетүү үчүн уруксаттын мөөнөтү бүтүп, мэрия тарабынан бир нече жолу күркөнү алгыла деген эскертүү берилген экен.

Бүгүн Жер пайдалануу жана курулуш башкармалыгынын жана “Тазалык” муниципалдык ишканасынын кызматкерлери күркөнү алуу үчүн барышкан. Биз дагы окуяны чагылдыруу үчүн барганбыз. Биз өзүбүздүн ишибизди жасап жатканда ошол жерди ижарага алып иштеткен күйөөсү менен аялы жана бир шериги "Тазалык" кызматкерлеринин ортосунда пикир келишпестик орун алды. Оператор Калыбек Абдумомутов аларды камерага тарта баштаганда кожоюндун аялы келип, камерага асылды. Камера иштен чыгып калды. Дароо эле милиция кызматкерлерине чалганыбызда бул жайды иштеткендер унаасына отуруп кетүүгө аракет кылышты. Биз алардын унаасын токтотолу деп алдына чыкканыбызда бизди качырып айдап кетти. Милиция кызматкерлери жерине келип, окуянын эмне болгону тууралуу маалымат алып жатканда май куюучу жайды иштеткен киши келди. Ал аялынын эпилепсия оорусу бар экенин, мындан улам аны ооруканага жеткирип келгенин айтты", - деди ал.