№12 үй-бүлөлүк медицина борборунун дарыгери акыркы стадиядагы рак менен күрөшкөн кызга дары жазып бербей койгон. Кыз ошол күнү каза болду

Бишкектеги хоспистин жетекчиси Ольга Труханова ракка кабылган кызга №12 үй-бүлөлүк медицина борборунун дарыгери дары жазып бербей койгонун социалдык баракчасына жазып чыкты.

"2-декабрь күнү биздин хосписке Онкологиядан 11 жаштагы Алинаны которушту. Кыз Арча-Бешик жаңы конушундагы №12 үй-бүлөлүк медицина борборунда катталган. Апасы эртең менен Онкологиядан берилген кагазды алып бейтапкана ооруну басаңдатуучу дарыга рецепт алуу үчүн барат. Саат 12:40та апасы хосписке дары-дармексиз, рецептсиз кайтып келди. Хоспистин медайымы бейтапкананын дарыгерине эмнеге бербей койгонунун себебин сурап чалса "мага кимге эмне жазышымды үйрөткүдөй сен кимсиң?" - деп коёт.

10 мүнөттөн кийин ал дарыгерге мен чалып, эмнеге оор абалдагы кызга рецепт жазбай жатасыңар десем, протокол бар дейт.

- Кандай протокол? Протоколдун бул жерге кандай тиешеси бар? Сизге баланын абалы тууралуу ак-кара менен жазылып турса, рецепт жазбай коюуга акыңар жок десем, ага деле "бизде протокол бар" деп туруп алды. Же кандай протокол экенин айта албайт. Эгер балага ооруну басаңдаткан дарыга рецепт жазып бербесеңер, Саламаттыкты сактоо министрлигине чалам да алар силерге кайсы протокол жөнүндө айтып жатканыңарды түшүндүрүп беришет десем "кереги жок, жазып беребиз" деди.

Мына ушуга окшогон билимсиз, адамгерчиликсиз дарыгерлердин айынан апасы кызынын жанында боло турган баалуу убактысын жоготту. Саат 14:50дө Алина көз жумду. Кудайга шүгүр, апасы жанында болду.

Ушуга окшогон канча дарыгер оорулууларды рецептсиз үйүнө кайтарып жатат. Оорулуулар кайра рецептке келбей калышы да мүмкүн. Кимдир-бирөө кайдыгер болгону үчүн адам жан чыдагыс оору менен алышып бул дүйнө менен коштошот.

Мындай качанга чейин улана бериши керек? Канча адамдар азапка, кыйноого алынгандай өлүшү керек?

P. S. Рецептти ал күнү беришкен жок, эртеси беришмек. Бизде бүгүнкүгө керектүү каражаттар болгону үчүн бала кыйналбай тынч кетти.