ЖЭБ соту: Айбек Калиев: "Бишкек ЖЭБине салыштырып жаткан Дүйшөмбү ЖЭБ-2 насыяны акча менен эмес, алтын жана башка баалуу кендери менен төлөйт"

Бүгүн, 4-декабрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Анда тараптардын жарыш сөзү жүрүүдө. "Улуттук энергетикалык холдингдин" мурдагы башчысы Айбек Калиев: "Кытай элчилигинин канцеляриясынан 8 жолу "TBEA" компаниясы долбоорду ишке ашыруудагы жалгыз талапкер экенин билдирген каттар келген. Алар Кытай тарап мамлекет ичиндеги бардык процедураларды жүргүзүп бүткөнүн эскерткен. Насыя боюнча макулдашуунун келишимине Кыргыз өлкөсүнө болгон алгачкы сапарынын алкагында кол коюлушун билдиришкен. Бүгүнкү күндө Кытайдын Кыргыз өлкөсүнө болгон биринчи сапарынын алкагында кол коюлган келишимди жокко чыгарып жатабыз. Бул эл аралык этиканы бузуу болуп саналат", - деди.

Мындан тышкары, Калиев Бишкек ЖЭБи менен Тажикстанда курулган ЖЭБди салыштыруу туура эмес экенин айтты.

"TBEA" компаниясы менен "Душанбинская горная промышленность" деп аталган ишкананын ортосунда ресурстук насыянын келишими түзүлгөн. Кытайдын бул инвестициясы ресурстарга алмашылган. Бул насыяны акча менен эмес, алтын, баалуу кендер, жерлер менен төлөнөт деген сөз. Бишкек ЖЭБине түзүлгөн келишим менен Дүйшөнбү ЖЭБине түзүлгөн келишим эки башка нерсе, аларды салыштырууга болбойт. Биздин келишим "EPS'нин" негизинде түзүлгөн. 2019-жылдын апрель айында "TBEA" компаниясы тарабынан Дүйшөмбү ЖЭБин курууну ишке ашыруу боюнча келишим түзүлгөн. Анда Кытайдын бул инвестициясы Памирдеги кен иштетүүчү жерлердин биринин ордуна берилип жатканы айтылган. Менин колумда айткандарымды тастыктаган документтер бар", - деди ал.