ЖЭБ соту: Отурумда 101 күбөнүн ичинен 91и айыптоочулар тараптан келгени айтылды

Бүгүн, 4-декабрда Бишкектеги Свердлов райондук сотунда Бишкек ЖЭБин жаңылоодогу коррупция боюнча соттук отурум уланууда. Анда тараптардын жарыш сөзү жүрүүдө.

"Улуттук энергетикалык холдингдин" мурдагы башчысы Айбек Калиев отурумда 101 күбө суракка алынганын айтып, алардын 91и айыптоочу тараптын кишилери экенин белгилеп өттү.

"Айыпта ЖЭБди модернизациялоодо эскертүүлөрдү эске алынган эмес деп жүрөт. Мен ал кандай эскертүүлөр экенин айта кетейин. Мисалы, гидранттын түсү кызыл болушу керек же сары болушу керек, эшиктердин кармоочторун алмаштырыш керек, дааратканаларга байланыштуу эскертүүлөр жана башка ушул сыяктуу. Мындай эскертүүлөр өндүрүшкө эч кандай тиешеси жок болгон", - деди ал.

Мындан тышкары, Айбек Калиев күбөлөрдүн көп болгонуна карабай, айыптоочу тарап Елисеев, Ширшов, Нурлан Өмүркул уулунун көрсөтмөлөрүнө таянып жатканын айтып нааразы болду.

"Эл Елисеев, Ширшов ким экенин жакшы билет. Кыргыз өлкөсүндө алардан башка адам калбай калдыбы? Менин байкоом боюнча, отурумга маанилүү күбө келип көрсөтмө берген күнү мамлекеттик каналдардан ЖЭБдеги аварияны көрсөтүп, элдин эсине сала баштайт", - деди ал.