ЖЭБ соту: Отурумда жактоочулар менен мамлекеттик айыптоочулар жана судья ортосунда кайым айтышуу орун алды

Бүгүн, 4-декабрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Анда тараптардын жарыш сөзү жүрүүдө.

"Улуттук энергетикалык холдингдин" мурдагы башчысы Айбек Калиев ЖЭБди модернизациялоо үч этап менен жүргөнүн айтты. Ошондой эле ал ЖЭБ боюнча жүргүзүлгөн соттук-экономикалык экспертиза мыйзам бузуулар менен жасалганын белгилеп өттү. Айбек Калиев мамлекеттик стандарттан өтпөгөн документ юридикалык күчкө ээ болбой турганын эскертти. Ага карабай экспертизаны жүргүзгөндөр мамлекеттик күчү жок документтерге таянып, бизге айып жазышты дейт.

Отурум учурунда мамлекеттик айыптоочулар Айбек Калиевдин сөзүн бөлүп, судьядан "Калиев иш боюнча гана айтып, бизге карата комментарий бербесин" деп суранды.

Жактоочулар жарыш сөздө прокурорлордун айткан сөзүнө шилтеме бербей, баяндама кылуу мүмкүн эместигин эскертишти. Ошондой эле жактоочу Бакыт Жумашев: "Жарыш сөздү эч ким чектөөгө укугу жок. Анда мамлекеттик айыптоочулар менин жакталуучумдун сөзүнүн кайсы бөлүгүндө аларга шек келтиргенин так көрсөтүп берсин", - деп судья Инара Гилядзединовадан мамлекеттик айыптоочуларга карата эскертүү берүүсүн суранды. Бирок судья жактоочу отурумдагы этиканы сактаган жок деп анын өзүнө эскертүү берди.