Коомдук ишмер Мукар Чолпонбаев: "Отунбаева айылдыктар тууралуу сөз айтам деп абдан катуу жаңылды". КҮНСОБОЛ

Утурумдук өкмөттүн төрайымы Роза Отунбаева саясатчы Өмүрбек Текебаевдин китебинин ачылыш аземинде сөз сүйлөп, Гапар Айтиев атындагы көркөм сүрөт музейинин мурдагы директору Мира Жангарачеванын кызматтан алынышы боюнча пикирин айтты. Ал "шаардын жарымы айылдыктар, бирок биз силердин деңгээлиңерге түшө албайбыз" деп билдирди. Анын бул сөзү коомчулукта кызуу талкууланып, айрымдары Отунбаеваны сындап жатышса, кээ бирлери коргоп жатат.

Мындан улам SUPER.KG порталы "Отунбаева "Бишкек шаарынын жарымы айылдыктар, бирок биз силердин деңгээлиңерге түшө албайбыз" деди. Тилинен жаңылдыбы же айткан сөзү орундуубу?" деген собол салды.

Коомдук ишмер Мукар Чолпонбаев Отунбаева сөзүнөн жаңылды деген ойдо.

"Анын болгон деңгээли ошол. Өзү эмне асмандан түшүптүрбү? Айылда төрөлүп, чоңойгон кыз болчу. Бүгүн эле мончого түшүп тазарып калыптырбы? Бишкектегилердин 90 пайызы айылдан келгендер. Адегенде адам сыртын эмес, ичин тазалашы керек. Ал сөзүнөн абдан катуу жаңылды. Бул жакшы сөз эмес", - дейт Чолпонбаев.