Касым-Жомарт Токаев Борбор Азиянын аймагындагы өлкөлөрдөн Кыргыз мамлекети гана кириллица арибин колдонорун айтты

Казакстандын президенти Касым-Жомарт Токаев Борбордук Азияда бир гана Кыргыз өлкөсү кириллица арибин колдонорун айтты. Бул тууралуу анын "Deutsche Welle" телеканалына берген маегинде белгилүү болгон.

Анда редакциянын журналисти Жанна Немцова Казакстан акырындык менен латын арибине өтүп жатканын, муну көпчүлүк Орусиядан алыстоо деп түшүнүп жатканын айтып, ырас эле ошондойбу деген суроо салган. Бул соболго Касым-Жомарт Токаев Орусиядан алыстоо деген түшүнүк таптакыр туура эмес деп жооп берген.

"Мурдагы президент Нурсултан Назарбаев тарабынан казак тилин реформалоо чечими кабыл алынган. Биз бул жерде орус тилине тийишкен жокпуз да. Назарбаевдин чечимине ылайык, 2025-жылдан баштап латын арибине толук өтүү керек болчу. Окумуштуулардын айтымында, латын ариби түрк коомчулугуна казак тилин жайылтууга чоң жардам берет. Түрк тили толугу менен латын арибине өткөн. Мындан тышкары, Азербайжан, Өзбекстан, Түркмөнстан дагы латын арибине өтүү чечимин кабыл алган. Борбордук Азия аймагында азырынча Кыргыз өлкөсү эле кириллица арибин колдонот", - деген ал.

Токаев мындан тышкары, Монголияда дагы кириллица арибин колдонорун кошумчалаган.

Казакстандын президенти 5-6-декабрда Германияга расмий иш сапары менен барат.