ЖЭБ соту: Жактоочу: "1-класстын окуучусу деле сунуштардын ичинен Кыргыз өлкөсү үчүн алгылыктуусу "TBEA" компаниясы деп жооп бермек"

Бүгүн, 5-декабрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Анда тараптардын жарыш сөзү жүрүүдө. Отурумда "Электр станциялары" ишканасынын мурдагы башчысы Салайдин Авазовдун жактоочусу Сергей Манукян жарыш сөзгө чыкты.

Жактоочу 1-класстын баласы да бардык сунуштардын ичинен Кыргыз өлкөсү үчүн эң алгылыктуусу "TBEA" компаниясынын сунушу деп жооп бермек деп белгиледи.

"Салайдин Авазовго коюлган күнөө, анын кызмат абалынан пайдаланып, мамлекеттик мааниге ээ, стратегиялык объектини жаңылоодо мыйзамсыз иш-аракеттерди жасаган деп башталат. Ошону менен Авазов мамлекетке топтогу башка адамдар менен биргеликте ири көлөмдөгү чыгым келтиргендиги айтылууда. Айыптоочу тарап Авазов чет элдик компаниянын кызыкчылыгын көздөп, алардын материалдык жактан пайда алуусуна көмөк көрсөткөн деп жазган. Бишкек ЖЭБин модернизациялоону ишке ашырууга эки компаниянын тең сунуштары каралган. Дүйнөлүк банк СМЕС корпорациясын, ал эми Кытай мамлекети TBEA компаниясын көрсөткөн. Белгилей кетүүчү нерсе, айыптоочулар айтып жаткан 150 миллион АКШ долларына СМЕС корпорациясы модернизациялоону эмес, 5 казан агрегаттарын жана 2 түтүк агрегатты гана алмаштырып бермек. Мындан тышкары Авазовдун айтуусунда, алар СМЕС корпорациясынын техникалык сунушу менен адистер менен биргеликте таанышып чыккан. Мындан кийин алар СМЕС корпорациясына өз сунуштарын жана эскертүүлөрүн жөнөткөн. Ошондой эле "Электр станциялары" ишканасы СМЕС корпорациясына, модернизациялоо боюнча алардын шарттары жана финансалык модели менен таанышууга кызыкдар экенин билдирген кат жөнөткөн", - деди жактоочу Манукян.

Жактоочу СМЕС бир гана Бишкек ЖЭБи эмес, өлкө боюнча башка энергетика тармагындагы долбоорлорду ишке ашыруу боюнча кызматтарын сунуштап келгенин кошумчалады.