ЖЭБ соту: Отурумда айыпталуучу Салайдин Авазов сүйлөп жатып, балдарын эстеп жашып кетти

Бүгүн, 5-декабрда Бишкектеги Свердлов райондук сотунда ЖЭБди жаңылоодогу соттук отурум уланууда. Анда тараптардын жарыш сөзү жүрүүдө.

"Электр станциялары" ишканасынын мурдагы башчысы Салайдин Авазов өз сөзүндө эгер убакытты кайра артка кайтарууга мүмкүн болсо, 2013-жылга долбоорду баштабай коймок экенин белгиледи.

Отурум учурунда Авазов балдарын эстеп, сүйлөп жатып жашып кетти. Андан кийин өзүн колго алып, сөзүн улады.

"Өз ишмердигимде ар дайым ак ниеттүү эмгектенип келгем. Бул нерсени мени менен иштегендердин баары билет. Энергетика тармагындагы ачык-айкындуулукка басым жасап, коррупциялык схемаларга каршы күрөшүп келгем. Бишкекте дагы, Жалал-Абад электр станциясына келгенде дагы калк үчүн ачык схемаларды түзгөм. Учурда ал жакта 12 жыл өткөнүнө карабай, менин схемам боюнча иш жүрүп жатат. А мени бул жерде 65 жашка чыкканда "коррупцияга" күнөөлөп, камакта кармап жатышат. Мен азыр ичимдеги нерселерди айта баштасам көзүмө жаш келет. Айла жок, бул жакта ушундай нерселер жөнүндө айтууга туура келип жатат. Балам келгенде жубайым мага биринчи жолу ыйлаганымды көргөнүн айтты. Себеби менин мүнөзүм катаал, эмоцияга алдырчу эмесмин. Бирок бул жакта бизди ушундай абалга келтирип коюшту", - деди ал.