Бишкекте унаа айдап бара жатканда асманга карай ок аткан унаанын айдоочусу кармалды

Бишкектин Түштүк магистралы менен Тынчтык кең көчөсүнүн кесилишинде асманга карай ок аткан унаанын айдоочусу кармалды. Кармалган жарандын жанынан МР-371 КВ үлгүсүндөгү тапанча табылганын Бишкек ШИИББинин басма сөз кызматынан кабарлады.

Бүгүн, 5-декабрда саат 13:42де нөөмөт бөлүмгө билдирүү келип түшкөн. Анда белгисиз жаран Чыңгыз Айтматов кең көчөсү менен Абсамат Масалиев көчөсүнүн кесилишинде асманга карата ок чыгарып жатканы маалымдалган.

"Жерине Ленин РИИБинин ыкчам тергөө тобу барып алдын ала маалымат чогулткан. Ага ылайык, саат 13:40 чамасында аталган көчөдөн үлпөт тойдун кортежи өтүп жатканда Тойота Камри үлгүсүндөгү унаанын айдоочусу асманга карата ок чыгарган.

Бул факт Кылмыштардын жана жоруктардын бирдиктүү реестрине 266-берене (бейбаштык) менен катталып, сотко чейинки өндүрүш иши ачылган.

Ыкчам издөө иш-чараларынын алкагында алгач унаа табылып, андан кийин шектүү катары 1996-жылы туулган Д.М. аттуу жаран кармалган. Кылмышка шектелген жарандын жанынан Макаров тапанчасы жана огу жок магазин табылган. Учурда тергөө иштери улантылып, тийиштүү экспертизалар дайындалды", - деп билдирет маалымат кызматынан.

Бишкектин Түштүк магистралы менен Тынчтык кең көчөсүнүн кесилишинде жеңил унааны айдап бара жаткан айдоочу асманга карай ок атып, андан соң жолун улаган видео интернетке тараган.