ЖЭБ соту: Мамлекеттик айыптоочу: "ЖЭБ боюнча отургандар өздөрүн баатыр көрсөтүүгө аракет жасашты"

Бүгүн, 6-декабрда Бишкектеги Свердлов райондук сотунда Бишкек ЖЭБин жаңылоодогу коррупция боюнча соттук отурум уланууда. Анда тараптардын репликалары орун алууда.

Отурумда мамлекеттик айыптоочулар жарыш сөздө айтылган чечимди өзгөртүүсүз калтырышканын айтышты.

"Процесс учурунда жакталуучу тараптын бардык негиздерин, жүйөлөрүн кунт коюп уктук. Биз жарыш сөздө айтылган далилдерден баш тартпайбыз. Жактоочулар иштин материалдарында так көрсөтүлүп турган далилдерди эске албай, аларды бурмалоого аракет кылышты. Мыйзам долбоорунун келишиминин күчүнө кириши боюнча токтолсок, анда дагы көптөгөн мыйзам бузуулар болгонун депутаттар өз көрсөтмөлөрүндө айтып беришти. Мындан тышкары, Жогорку Кеңештин депутаттары ЖЭБ боюнча долбоор президенттик аппараттан көзөмөлдөнүп турганын белгилешти. Ал эми модернизация маселесин көтөрүп чыккан депутат Кожобек Рыспаевге Сапар Исаков тарабынан басым жасалганы жана эскертүү берилгени көрсөтмөдө айтылды.

Жактоочулардын алардын жакталуучулары чыгарган экспертизанын жыйынтыгы менен кеч таанышып, мыйзамдуу укугунан ажыратылды деген жүйөсү тууралуу айта кетели, алар каалаган убакта өтүнүч берип экспертизаны кайра жасата алмак. Жакталуучу тарап өзүнө Жогорку судьянын милдетин алып, прокурорлордун чечимин сынга алып жатышты. Айыпталуучулар элдин алдында өздөрүн баатыр көрсөтүүгө аракет жасашты", - деди мамлекеттик айыптоочу Кулжабаев.