ЖЭБ соту: Мурдагы өкмөт башчы Жантөрө Сатыбалдиев: "Силер бизди эмес, мыйзамды соттоп жатасыңар"

Бүгүн, 6-декабрда Бишкектеги Свердлов райондук сотунда ЖЭБди жаңылоодогу коррупция боюнча соттук отурум уланууда. Анда судья айыптоочуларга акыркы сөз берди. Мурдагы өкмөт башчы Жантөрө Сатыбалдиев акыркы сөзүндө залда бир нече айдан бери дайыма отурумга катышып жүргөн адамдар отурганын белгиледи. ЖЭБ кандай модернизация болгонун ушул адамдардай эч ким жакшы билбесин айтып, ЖМКларда туура маалымат таратыларына ишеним кылып жатканын билдирди.

"Эгиз бир тууган болсо дагы, аларда эки башка пикир болушу мүмкүн. Ошондой эле Жогорку Кеңештеги ар кандай фракцияларда анын ичинде ар кайсы депутаттарда ар биринин өзүнө тиешелүү пикири, позициясы болот. Бир күнү бир фракциянын өкүлү келет, тиги экөөнө алтын туфли кийгизип, эмнеге мага жок деп келет. Эртең менен бир фракция келип, "сен кечээ бул министрди коюпсуң, бүгүн меникин кой" дейт. Макул, маселени карап көрөлү деп кетирсең, эртеси башка бирөөсү келет. Муну менен алардын баарын бир чечимге келтирүү мүмкүн эмес экенин билдиргим келип жатат. Ошону менен айыптоочу тараптын мени ТЭО жок туруп документке кол койгон деген жүйөсү негизсиз. Камакта отурганда тергөөчү мени суракка эки жолу гана чакырды. Анда мени эмнеге камап отурганын түшүнгөн жокмун. Өзүмө байланыштуу бир мисал келтирейин, Чыңгызхан өз жоокерлерине салык чогултууга тапшырма берет. Калк кыйналат, акырында күлө баштайт. Эми мага дагы ыйлагандан өтүп, күлгөн гана калды. Анткени мамлекеттин мыйзамдары боюнча иш алып барсаң, мыйзам бузуу катары каралып жатат. Башкача айтканда, силер биздин эмес, мыйзамдарды соттоп жатасыңар", - деди ал.