ЖЭБ соту: Ольга Лаврова акыркы сөзүн айтып жатып ыйлап жиберди

Бүгүн, 6-декабрда Свердлов райондук сотунда ЖЭБди жаңылоодогу соттук отурум уланууда. Анда айыпталуучуларга акыркы сөз айтуу кезеги берилди. Мурдагы финансы министри Ольга Лаврова аны карьеризмге жана жеке кызыкчылыкка айыптап жатышканын айтып, "63 жашта каяктагы карьеризм?" деп сурады.

"Мамлекеттик айыптоочулар мени насыя боюнча келишимге кол койгон деп күнөөлөшүүдө. Бул документтер укуктук- нормативдик акты катары саналбашын тастыктаган Юстиция министрлигинен келген катты көрсөткөм. Бирок мамлекеттик айыптоочулар аны эске алган жок. Менин эмгек стажым 40 жылды түзөт. Анын 30 жылы жетекчилик кызматтарда өттү. Менин карьерам эчак эле түптөлгөн", - деп ыйлап жиберди Лаврова.

Мурдагы финансы министри эч качан бир кылмышка айыпталып, соттун алдында актанам деп ойлогон эместигин кошумчалады.