Төшүн кармап баратат деп талкуу болгон сүрөт. Унаанын айдоочусу ким экени аныкталды

Интернетте 578 АСD мамлекеттик номер менен жүргөн бир канча унаанын сүрөттөрү жарыяланып, унаалардын айдоочусу Мамлекеттик каттоо кызматынын жетекчиси Алмаз Мамбетов болушу мүмкүн экендиги талкууга алынган. Мамкаттоо кызматынан бул маалыматты четке кагып, Алмаз Мамбетов интернетке тараган сүрөттөргө өзү таң калып жатканын билдиришкен эле.

Социалдык тармактарга тарап кеткен сүрөттөрдүн бирине карата “Алмаз Мамбетов орун басарынын төшүн кармап жатат” деген билдирүү жазылган. Бул боюнча SUPER.KG порталына Мамкаттоонун төрагасынын орун басары Айнура Туйбаева комментарий берген.

Бүгүн, 10-декабрда Республикалык жол кыймылынын коопсуздугун камсыздоо башкы башкармалыгынын басма сөз кызматынын жетекчиси Тилек Исаев 578 АСD номерлүү Мерседес унаасын 22 жаштагы Н.Т. аттуу Бишкек шаарынын тургуну айдап баратканын билдирди.

"Жол кыймылынын коопсуздугун камсыздоо башкы башкармалыгы 578 АСD мамлекеттик номер менен жүргөн бир канча унаанын сүрөттөрү боюнча маалымат берет. Анда оперативдүү жүргүзүлгөн иштердин негизинде, 578 АСD номерлүү ак түстөгү Мерседес унаасын ошол күнү 22 жаштагы Н.Т. аттуу жаран айдап жүргөн. Издөө иштеринде ал жаран табылып, унаа атайын унаа токтотуучу жайга киргизилген. Н.Т. ошол күнү Бишкекте өзүнүн сүйлөшкөн кызы менен унаада бара жатканын айткан. Ошондой эле ал Мамлекеттик каттоо кызматында жана прокуратурада иштебей турганын билдирген. Учурда айдоочуга бузуулар кодекси боюнча протокол толтурулуп, ал Бишкек ШИИББине жөнөтүлдү. Алдыда башка 578 номерин таккан унаалар изделип жатат.

Ал эми интернетте тарап жаткан унааны Чүй прокуратурасынын кызматкери башкарып бара жаткан деген маалымат да чындыкка дал келбейт", - деди ал.