Жалал-Абадда "Селсаяк" аталышындагы рейд өткөрүлдү. Текшерүүгө алынган адамдардын арасында оор тагдырга туш болгон аялдар да бар

Жалал-Абадда "Селсаяк" аталышындагы рейд өткөрүлдү. Бул тууралуу Жалал-Абад ОИИБинин басма сөз кызматынан билдиришти.

Маалыматка ылайык, рейд 10-11-декабрь күндөрү болуп өттү. Анда Жалал-Абад шаарынын коомдук жайларында, көчөлөрүндө таң эртеден кечке чейин ыңгайсыздык жаратып, аракечтикке байланып, үй-бүлөсүз жана кароосуз калгандарды аныктоо иштери уюштурулду.

"Рейд учурунда жалпысынан 17 адам текшерүүгө алынып, аты-жөнү такталып, бармак издери алынып, тиешелүү иштер жүргүзүлдү. Алардын ичинен 12 жаран райондордон келгендиги белгилүү болуп, туугандары менен милиция кызматкерлери байланышып, жакындарына өткөрүлүп берилди. Ал эми 5 жаран шаар тургундары болуп чыккан. Жалал-Абад мэриясынын алдындагы суук түшкөндө селсаяктар үчүн каралган жылуу жайга жайгаштырылды. Белгилей кетсек арасында тагдырдын оор сыноосуна туш болуп, аракечтикке алдырып койгон жарандардын ичинде аялдар да бар. Алар бул жолго түшкөндүктөрүнүн себебин жакырчылык жана бала кездеги жаңылыштыктан болгонун айтышкан", - деди басма сөз кызматынан.